MISSALE MIXTUM Secundum Regulam Beati Isidori DICTUM MOZARABES.

[PL 85:1-7,93-94,99,105,217-234]

Dominica Prima Adventus Domini

(Note: * signifies that the section is part of the proper - that is, it varies. However, ** signifies that the section only varies occasionally.)

Preparatio Misse

(Quando preparatus sit Sacerdos ad Missam celebrandum: ingressus ad sacrarium lavet manus dicendo.)

Oratio

Oremus.

Largire sensibus nostris quesumus Domine omnipotens Pater: ut sicut exterius inquinamenta manuum abluuntur: sic per te mentium sordes misericorditer emundentur: et crescat in nobis augmentum sanctarum virtutum. Per Christum Dominum nostrum.

(Postea flectat genua coram vestibus: et dicat quatuor Ave Maria. Et de intimo corde commendet se gloriose Virgini Marie: ut offerat illud acceptabile mysterium [(Corrige.) ministrum] Deo Patri et Filio et Spiritui Sancto. Et ut ipsam in hoc sacrificio mediatricem et adjutricem habeat. Deinde muniat se signo crucis et super quamlibet vestem dicat.)

In nomine Patris + et Filii et Spiritus Sancti. Amen.

Ad amictum. Oratio.

Pone Domine galeam salutis in capite meo: ad expugnandas et superandas omnes diabolicas fraudes: omniumque inimicorum meorum seviciam superandam. Per Christum Dominum nostrum.

Ad albam. Oratio.

Indue me Domine vestimento salutis: ac tunica justicie: et indumento leticie circumda semper. Per Christum Dominum nostrum.

Ad cingulum. Oratio.

Precinge Domine cingulo fidei: et virtute castitatis lumbos mei corporis: et extingue in eis humorem libidinis: ut jugiter maneat in me tenor totius castitatis. Per Christum Dominum nostrum.

Ad manipulum. Oratio.

Merear queso Domine deportare manipulum justicie: et ferre cum patientia: ut illum cum exultatione deferendo cum tuis Sanctis portionem accipiam. Per Christum Dominum nostrum.

Ad stolam. Oratio.

Redde mihi Domine obsecro stolam immortalitatis: quam perdidi in prevaricatione primi parentis: et quia cum hoc ornamento quamvis indignus accedere ad tuum sanctum presumo mysterium: presta ut cum eodem letari merear in perpetuum. Per Christum Dominum nostrum.

Ad casulam. Oratio.

Jugum tuum Domine suave est: et onus tuum leve: presta ut sic illud deportare valeam: ut consequi possim tuam gratiam. Per Christum Dominum nostrum.

(Postea quam Sacerdos sit indutus dicat hoc.)

R. Pater peccavi in celum et coram te: jam non sum dignus vocari filius tuus. Fac me sicut unum de mercenariis tuis. V. Quanti mercenarii in domo patris mei abundant panibus: ego autem hic fame pereo: surgam et ibo ad patrem meum et dicam ei. P. Fac me sicut unum de mercenariis tuis. (Luke 15:18b-19,17b-18a)

Kyrieleyson. Christeleyson. Kyrieleyson.

Pater noster qui es in celis. Sanctificetur nomen tuum. Adveniat regnum tuum. Fiat voluntas tua: sicut in celo et in terra. Panem nostrum quotidianum da nobis hodie. Et dimitte nobis debita nostra: sicut et nos dimittimus debitoribus nostris. Et ne nos inducas in tentationem. Sed libera nos a malo.

V. Ab occultis meis munda me Domine. R. Et ab alienis parce servo tuo.

V. Domine exaudi orationem meam. R. Et clamor meus ad te veniat.

Oratio

Oremus.

Deus qui de indignis dignos: de peccatoribus justos: et de immundis facis mundos: munda cor meum et corpus meum a omni sorde et cogitatione peccati: et fac me dignum atque strenuum sanctis altaribus tuis ministrum: et presta ut in hoc altari ad quod indignus accedere presumo: acceptabiles tibi hostias offeram pro peccatis et offensionibus: et innumeris quotidianis meis excessibus: et pro peccatis omnium viventium: et defunctorum fidelium: et eorum qui se meis commendaverunt orationibus: et per eum tibi meum sit acceptabile votum: qui se tibi Deo Patri pro nobis obtulit in sacrificium: qui est omnium opifex et solus sine peccati macula Pontifex. Jesus Christus filius tuus Dominus noster. Qui tecum vivit et regnat in unitate Spiritus Sancti Deus: per omnia secula seculorum. Amen.

(Et statim manibus junctis coram pectoribus humilite exeat: et eat ad altare: et faciat confessinem dicendo prius.)

Ave Maria...

In nomine Domini nostri Jesu Christi. Amen.

Sancti Spiritus adsit nobis gratia.

V. Introibo ad altare Dei. R. Ad Deum qui letificat juventutem meam.

P. Judica me Deus. ([Psalm 42] totum cum Gloria Patri.)

V. Introibo ad altare Dei. R. Ad Deum qui letificat juventutem meam.

V. Dignare Domine die isto. R. Sine peccato nos custodire.

V. Confitemini Domino quoniam bonus. R. Quoniam in seculum misericordia ejus.

V. Ora pro nobis sancta Dei genitrix. R. Ut digni efficiamur promissionibus Christi.

(Dicat Presb. ante Altare antequam faciat confessionem in omnibus Festis precipuis.)

Per gloriam nominis tui Christe fili Dei vivi et per intercessionem sancte Marie Virginis et beati Jacobi et omnium Sanctorum tuorum auxiliare et miserere indignis servis tuis et esto in medio nostri Deus noster qui vivis et regnas in secula seculorum. Deo gratias.

Confessio

Confiteor omnipotenti Deo et beate Marie Virgini: et Sanctis Apostolis Petro et Paulo et omnibus Sanctis: et vobis fratres manifesto me graviter peccasse per superbiam: in lege Dei mei: cogitatione: locutione: opere et omissione: mea culpa: mea culpa: gravissima mea culpa. Ideo precor beatissimam Virginem Mariam: et omnes Sanctos et Sanctas: et vos fratres orare pro me.

Absolutio

Misereatur vestri omnipotens Deus: et dimissis omnibus peccatis vestris: perducat vos ad vitam eternam. Amen.

Absolutio ad populum

Indulgentiam absolutionem et remissionem omnium peccatorum vestrorum cum emendatione morum et vite: per gratiam Sancti Spiritus tribuat vobis misericors Dominus. Amen.

V. Deus tu conversus vivificabis nos. R. Et plebs tua letabitur in te.

V. Ostende nobis misericordiam tuam. R. Et salutare tuum da nobis.

V. Sacerdotes tui induantur justiciam. R. Et Sancti tui exultent.

V. Domine exaudi orationem meam. R. Et clamor meus ad te veniat.

V. Dominus vobiscum. R. Et cum spiritu tuo.

Oratio

Oremus.

Aufer a nobis quesumus Domine: cunctas iniquitates nostras: et spiritum superbie et elationis cui resistis: et reple nos spiritu timoris: et da nobis cor contritum et humiliatum: quod non spernis: ut ad Sancta Sanctorum puris mereamur mentibus introire. Per Dominum nostrum Jesum Christum filium tuum: qui tecum vivit et regnat in unitate ejusdem Spiritus Sancti Deus: per omnia secula seculorum.

Amen.

(Et statim accedat altare: et faciat crucem super aram dicendo.)

In nomine Patris + et Filii et Spiritus Sancti. Amen.

(Et osculetur aram: et osculando eam dicat.)

Ant. Salve crux pretiosa que in corpore Christi dedicata es: et ex membris ejus tamquam margaritis ornata: salva presentem catervam in tuis laudibus jugiter congregatam.

V. Adoramus te Christe et benedicimus tibi. R. Quia per sanctam crucem tuam redemisti mundum.

Oremus.

Oratio

Exaudi nos Deus salutaris noster: et per triumphum sancte Crucis: a cunctis nos defende periculis. Per Christum Dominum nostrum.

Oratio

Per virtutem sancte Crucis: et per intercessionem beate Marie Virginis: et beati Petri Apostolorum Principis: et omnium Sanctorum: absolve quesumus Domine nostrorum vincula delictorum: et quicquid pro eis meremur: propiciatus averte: et ad benefica recolenda quibus nos instaurare dignatus es: tribue venire gaudentes. Per Christum Dominum nostrum.

(Alia.) Conscientias nostris.

(Alia Oratio.) Adsit nobis Domine.

(Ad extendendum corporalia dicat Sacerdos.)

In tuo conspectu quesumus Domine hec nostra munera tibi placita sint: ut nos tibi placere valeamus: attollite portas principes vestras: et elevamini porte eternales: et introibit Rex glorie. Quis est iste Rex glorie? Dominus fortis et potens in prelio: Dominus virtutum ipse est Rex glorie. (Psalm 23:7,8,10)

(Mundando calicem dicat.)

Dignare Domine mundare vas istud: in quo sumere preciosum sanctum corpus tuum valeam. Qui cum Patre et Spiritu Sancto vivis et regnas Deus per omnia secula seculorum.

(Quando ponit vinum.)

Misce quesumus Domine in calice isto quod manavit ex latere tuo: ut fiat in remissionem peccatorum nostrorum. Amen.

(Benedictio aque.)

Jube Domne benedicere.

(Dicat minister.)

Ab illo benedicatur: cujus Spiritus super aquas ferebatur. In nomine Patris et Filii et Spiritus Sancti. Amen.

Oratio

Ex latere Domini nostri Jesu Christi sanguis et aqua exiisse perhibentur: hec ideo nos pariter commiscemus: ut misericors Deus utrumque ad medelam animarum nostrarum sanctificare dignetur. Per eundem Christum Dominum nostrum. Amen.

(Quando ponit hostiam in patena dicat.)

Benedictio Dei Pa + tris omnipotentis et Filii et Spiritus Sancti: descendat super hanc hostiam tibi Deo Patri offerendam. Amen.

Ad Missam Officium (Nahum 4:15; Isaiah 52:7; Psalm 67:12)

* Ecce super montes pedes evangelizantis pacem alleluja. Et annunciantis bona alleluja: celebra Juda festivitates tuas alleluja. Et redde Domino vota tua alleluja. V. Dominus dabit verbum evangelizantibus in virtute multa. P. Et redde Domino vota tua alleluja. V. Gloria et honor Patri et Filio et Spiritui Sancto in secula seculorum amen. P. Et redde Domino vota tua alleluja.

(Dicat Presb. in medium altaris.)

Per omnia semper secula seculorum. R. Amen.

[Hymnus Angelicus

(In adventu Domini non dicimus: Gloria in excelsis Dominicis diebus et feriis: sed tantum diebus festivis.)

P. Gloria...

(Et prosequatur a choro usque in fin. per totum annum preter in adventu Domini in Quadrag. et in diebus feriis.)

...in excelsis Deo. Et in terra pax hominibus bone voluntatis. Laudamus te. Benedicimus te. Adoramus te. Glorificamus te. Gratias agimus tibi propter magnam gloriam tuam. Domine Deus Rex celestis: Deus Pater omnipotens. Domine Fili unigenite Jesu Christe. Domine Deus agnus Dei Filius patris. Qui tollis peccata mundi: miserere nobis. Qui tollis peccata mundi: suscipe deprecationem nostram. Qui sedes ad dexteram Patris: miserere nobis. Quoniam tu solus Sanctus. Tu solus Dominus. Tu solus altissimus Jesu Christe. Cum Sancto Spiritu in gloria Dei Patris. Amen.

P. Per omnia semper secula seculorum. R. Amen.]

Oratio

** Deus qui per angelicos choros adventum filii tui Domini nostri Jesu Christi annunciare voluisti: qui per Angelorum preconia gloria in excelsis Deo et in terra pax hominibus bone voluntatis adclamantibus demonstrasti: concede ut in hujus Dominice Resurrectionis Festivitate: pax terris reddita convalescat: et fraterne delectionis charitate innovata permaneat.

R. Amen.

(Dicat Presb. in medium altaris.)

Per misericordiam tuam Deus noster qui es benedictus: et vivis et omnia regis in secula seculorum. R. Amen.

Dominus sit semper vobiscum. R. Et cum spiritu tuo.

Prophetia (Isaiah 10:33-11:11)

* Lectio libri Esaye prophete. R. Deo gratias.

* Ecce dominator Dominus... sepulchrum ejus gloriosum. R. Amen.

(Dicat Presb. in cornu sinistrum altaris.)

Dominus sit semper vobiscum. R. Et cum spiritu tuo.

Hymnus Puerorum

(Ante Psallendo in omnium missarum solemnitate de pulpito canebatur ex decreto concilii IV Toletani.)

Tractus (Daniel 3:49-52)

Hymnus trium puerorum. Angelus Domini similiter descendit cum Anania et sociis ejus in fornacem. Et excussit flammam ignis de fornace: et fecit medium fornacis: tanquam spiritus roris flantem. Et non tetigit eos omnino ignis: nec contristavit: nec quicquam moleste eis intulit. Tunc illi tres quasi ex uno ore laudabant: et magnificabant: et benedicebant Dominum de fornace dicentes. Domine Deus patrum nostrorum et laudabilis es et superexaltatus in secula. Amen.

Hymnus (Daniel 3:52,55,56,57,58,63,82,84,87,88)

(Hic incipiat Sacerdos.)

Benedictus es Domine Deus patrum nostrorum: et admirabilis et superexaltatus in secula. Amen. V. Et benedictum nomen majestatis tue illud sanctum. P. Et superexaltatus in secula. Amen. V. Benedictus es qui vides abyssos: sedes super cherubim et laudabilis. P. Et superexaltatus in secula. Amen. V. Benedictus es in solidamento celi: et laudabilis et gloriosus in secula. P. Et superexaltatus in secula. Amen. V. Benedicite omnia opera Domini Dominum: benedicite angele Dei Dominum: benedicite stelle celi Dominum. P. Hymnum dicite et superexaltate eum in secula. Amen. V. Benedicite filii hominum Dominum: benedicite Sacerdotis Dei Dominum. Benedicite sancti et humiles corde Dominum. P. Hymnum dicite et superexaltate eum in secula. Amen. V. BenediciteAnania Azaria et Misael Dominum. Hymnum dicite et superexaltate eum in secula. Amen. V. Quia liberavit nos ab inferis et de manu mortis salvavit nos et eripuit nos de medio camino ardentis flamme et e medio ignis eduxit nos.

Confitemini (Psalm 105)

(Absoluto hymno trium puerorum, canebatur psalmus centesimus quintus, confitemini, cujus primum versum sacerdos canebat, reliqua psalmistae et populus.) [Only the first verse is now said.]

V. Confitemini Domino quoniam bonus: quoniam in seculum misericordiam ejus. (Psalm 105:1; cf. Daniel 3:89) R. Amen.

(Dicat Sacerdos.)

Dominus sit semper vobiscum. R. Et cum spiritu tuo.

Psallendo (Psalm 147:16-18)

* Qui dat nivem sicut lanam: nebulam velut cinerem spargit: qui emittit christallum suam sicut frustra panis. Ante faciem frigoris ejus qui subsistet? V. mittit verbum suum et liquefaciet ea: flat spiritus ejus et fluent aquae. P. Ante faciem frigoris ejus qui subsistet?

(Dicat diaconus.)

Silentium facite.

(Hic ponat vinum in calice dum dicitur epistola.) [Obsolete.]

Epistola (Romans 15:14-29)

* Sequentia Epistole Pauli Apostoli ad Romanos. (Respon. Chorus.) Deo gratias.

* Fratres: Certus sum ego... benedictionis Christum verum. R. Amen.

(Dicat Sacerdos.)

Dominus sit semper vobiscum. R. Et cum spiritu tuo.

Oratio

(Ante Evangelium dicat Sacerdos.)

Conforta me Rex Sanctorum summum tenens principatum: da sermonem rectum et bene sonantem in os meum: ut placeam tibi et omnibus circumstantibus.

(Inclinet se in medium altaris: et dicat.)

Jube Domne benedicere. Dominus sit in corde meo et in ore meo et in labii meis: ad

pronunciandum sanctum Evangelium divinum.

(Diachonus vero dicat.)

Munda cor meum corpusque ac labia mea: omnipotens et misericors Deus: qui labie Esaye prophete calculo mundasti ignito. Ita et me tua gratissima miserationes mundare digneris: ut sanctum valeam Evangelium nunciare. Per Christum Dominum nostrum. Amen.

(Quando petit benedictionem a Sacerdote.)

Jube domine benedicere.

(Dicat Sacerdos.)

Corroboret Dominus sensum tuum ac labia tua: ut recte pronuncies nobis eloquia sancta sua.

Evangelium (Luke 3:1-18)

* Lectio sancti Evangelii secundum Lucam. (R. Chorus.) Gloria tibi Domine.

* Anno quintodecimo Imperii... exhortans: evangelizabat populo. R. Amen.

(Dicat Presb.)

Dominus sit semper vobiscum. R. Et cum spiritu tuo.

(Quando osculatur Evangelium. Dicat Presb.)

Ave Verbum divinum: reformatio virtutum: restitutio sanitatum.

Lauda (Psalm 19:3; textus Scripturae accommodatur ad praesens officium.)

(Dicat Chorus.)

* Alleluja. V. Mitte nobis Domine auxilium de sancto: et de Syon tuere nos alleluja.

(Interim quod Chorus dicit alleluja: offert Sacerdos hostiam cum calice et cum orationibus que sequuntur.)

Acceptabilis sit majestati tue omnipotens eterne Deus hec oblatio: quam tibi offerimus pro reatibus et facinoribus nostris: et pro stabilitate sancte catholice et apostolice fidei cultoribus: per Christum Dominum nostrum. In nomine Patris + et Filii et Spiritus Sancti. Amen.

(Dimittendo patenam super corporales. Deinde accipiat calicem sanctificando sic.)

In nomine Patris + et Filii et Spiritus Sancti amen.

Oratio

Offerimus tibi Domine calicem ad benedicendem sanguinem Christi filii tui: deprecamurque clementiam tuam: ut ante conspectum divine majestatis tue: cum odore suavitatis ascendat. Per eundem Christum Dominum nostrum amen.

(Ponat calicem super aram: et accipiat filiolam [id est palla qua calix tegitur] sine sanctificatione et ponat super calicem dicendo sic.)

Oratio

Hanc oblationem quesumus Domine placatus admitte: et omnium offerentium eorum pro quibus tibi offertur peccata indulge. Per Christum Dominum nostrum amen.

(Et dicat junctis manibus inclinando se.)

Oratio

In spiritu humilitatis et in animo contrito suscipiamur Domine a te: et sic fiat sacrificium nostrum: ut a te suscipiamur hodie: ut placeat tibi Domine Deus. Veni Sancte Spiritus sanctificator: sanctifica hoc sacrificium de manibus meis tibi preparatum.

(Hic ponat incensum in thuribulo et incenset sacrificium si placuerit:...)

Benedictio incensi

Jube Domine benedicere. Ab illo benedicatur: in cujus honore cremabitur. In nomine Patris et Filii et Spiritus sancti. Amen.

Oratio

(Incensando dicat Sacerdos.)

Placare Domine per hoc incensum mihi et opulo tuo: parcens peccatis nostris: et quiescat ira et furor tuus: presta propicius: ut bonus odor simus tibi in vitam eternam. Amen.

(...postea inclinet es Sacerdos in medium altaris junctis manibus: et dicat alta voce.)

Adjuvate me fratres in orationibus vestris et orate pro me ad Deum.

(Chorus respondeat.) Adjuvet te Pater et Filius et Spiritus Sanctus.

(Et Sacerdos vertat se ad populum; et faciat offertorium si voluerit.)

(Ad offertorium populi dicat Sacerdos offerenti.)

Centuplum accipias: et vitam eternam possideas in regno Dei. Amen.

(Sacerdos igitur post dictum Adjuvate me fratres, etc., convertit se ad populum, et si quis voluerit pecuniam aut alia quaelibet offere, accendens offert sacerdoti, qui, offerenti beneprecatus, ait: Centuplum accipias, etc., et ille, deosculans stolam sacerdotis, recedit, et alteri offerenti locum dat. Interim canitur sacrificium juxta rubricam.)

Sacrificium

(Et dicat Chorus.)

* Regnabit Dominus in Hierusalem: et in conspectu seniorum alleluja. V. Hec dicit Dominus: erit quasi paater habitantibus Hierusalem: et qui inhabitat in Syon: et dabo clavem domus David super humeros ejus et aperiet; et non est qui claudat Hierusalem alleluja.

Benedictionem panis

(Etiam antequam manus lavaret, sacerdos Eulogias benedicebat tempore communionis iis distribuendas qui ad communicandum apti non erant.) [No longer used.]

V. Adjutorium nostrum in nomine Domini. R. Qui fecit celum et terram.

V. Sit nomen Domini benedictum. R. Ex hoc nunc, et usque in seculum.

Oratio

Bene + dic Domine creaturam istam panis: sicut benedixisti quinque panes in deserto: ut omnes gustantes ex eo recipiant sanitatem tam anime quam corporis. Per Christum Dominum nostrum. Bene + dictio Dei Patris omnipotentis: et Filii: et Spiritus Sancti: descendat super hunc panem: et super omnes ex eo commedentes.

Ad lavandum manus

Lavabo inter innocentes manus meas: circumdabo altaretuum Domine: ut audiam vocem laudis tue: et enarrem universa mirabilia tua. Ne perdas cum impiis Deus animam meam: et cum viris sanguinem vitam meam. (Psalm 25:6,7,9)

(Hic accipiat Sacerdos aquam in manibus et dicat silentio super oblationem cum tribus digitis.)

In nomine Patris + et Filii et Spiritus Sancti regnas Deus in secula seculorum amen.

(Inclinet se ante Altare et dicat in silentio istam orationem.)

Accedam ad te in humiliate spiritus mei: loquar te: quia multam spem fortitudinem dedisti me: tu ergo filii David qui revelatus mysterio: ad nos in carnem venisti: clave crucis tue secreta cordis mei adaperi: mittens unum de Seraphim qui candens carbo ille qui de altari tuo sublatus est: sordentia labia mea emundat: mentem et jubilet: docendi materiam subministret: ut lingua que proximorum utilitati per charitatem servit ne erroris insonet casum: sed veritatis resultet sine fine preconium: per te Deus meus: qui vivis et regnas in secula seculorum amen.

Incipit Missa [scilicet fidelium]

(Dicat Presb.)

Dominus sit semper vobiscum. R. Et cum spiritu tuo.

Missa

* Adventum Domini nostri Jesu Christi fratres dilectissimi votis omnibus prestolantes: Dei patris omnipotentiam imploremus: ut corda nostra purificet: et corpora immaculata conservet. Det abilitatem fidelium mentibus fideliter quaerere: quod saluti possit prodesse. Expectemus conscientia secura venturum: quem super omnem principatum et potestates credimus exaltatum. Simus etiam per singula momenta solliciti: ut mereamur habere propicium quem credimus et fatemur ad judicandos nos vivos et mortuos in gloria esse venturum. R. Amen.

(Dicat Presb.)

Per misericordiam tuam Deus noster qui es benedictus: et vivis et omnia regis in secula seculorum. R. Amen.

(Dicat Presb. elevando manus.) Oremus.

(R. Chorus.) Agyos: Agyos: Agyos. Domine Deus Rex eterne tibi laudes et gratias.

(Postea dicat Presbiter.)

Ecclesiam sanctam catholicam in orationibus in mente habeamus: ut eam Dominus fide et spe et charitate propicius ampliare dignetur: omnes lapsos captivos infirmos atque peregrinos in mente habeamus: ut eos Dominus propicius redimere: sanare et confortare dignetur.

(R. Chorus.) Presta eterne omnipotens Deus.

Alia Oratio

(Postea dicat Presb.)

* Purifica Domine Deus Pater omnipotens pectorum archana nostrorum: cunctasque propicius maculas ablue peccatorum: ac presta Domine: ut beneficio pietatis tue nostris criminibus emundati: mentuendum terribilemque adventum Domini nostri Jesu Christi filii tui expectemus interriti. Sicque te miserante: hic percipere mereamur omnium veniam delictorum: ut tuum in futuro judicium nobis sentiamus omnino mitissimum: et dextere tue participes facti: a te mereamur perpetue vite percipere premium: tuumque consequamur invictum infinitum et fortissimum regnum. R. Amen.

Recitatio Nominum [id est Diptycha]

(Dicat Presb.)

Per misericordiam tuam Deus noster in cujus conspectu sanctorum Apostolorum et Martyrum Confessorum atque Virginum nomina recitantur.

(R. Chorus.) Amen.

(Dicat Presb.)

Offerunt Deo Domino oblationem Sacerdotes nostri: Papa Romensis: et reliqui pro se et pro omni clero ac plebibus ecclesie sibimet consignatis: vel pro universa fraternitate: item offerunt universi Presbiteri diachoni: Clerici ac populi circuma[d]stantes: in honorem sanctorum pro se et suis.

(R. Chorus.) Offerunt pro se et pro universa fraternitate.

(Dicat Sacerdos.)

Facientes commemorationem beatissimorum Apostolorum et Martyrum: gloriose Sancte Marie Virginis. Zacharie. Johannis. Jacobi. Andree. Philippi. Thome. Bartholomei. Matthei. Jacobi. Symonis et Jude. Matthie. Marci et luce.

(R. Chorus.) Et omnium martyrum.

(Dicat Sacerdos.)

Item pro spiritibus pausantium. Hilarii. Athanasii. Martini. Ambrosii. Augustini. Fulgentii. Leandri. Isidori. David. Juliani. Item Juliani. Petri. Item Petri. Johannis. Servi Dei. Visitani. Viventi. Felici. Cipriani. Vincentii. Gerontii. Zacharie. Cenapoli. Dominici. Justi. Saturnini. Salvati. Item Salvati. Bernardi. Reimundi. Johannis. Celebruni. Gundisalvi. Martini. Roderici. Johannis. Guterii. Sancii. Item Sancii. Dominici. Juliani. Philippi. Stephani. Johannis. Item Johannis. Felicis.

(R. Chorus.) Et omnium pausantium.

Post nomina

(Dicat Presb.)

* Te quesumus Domine Jesu Christe: ut dilectio adventus tui ita in nobis permaneat: ne a te corda nostra unquam recedant. Sicque nos jam in eternam advocationem ascribe: ut ad futurum non confundamur: cum ad judicandum veneris orbem.

(R. Chorus.) Amen.

(Dicat Presb.)

Quia tu es vita vivorum: sanitas infirmorum: ac requies omnium fidelium defunctorum in eterna secula seculorum.

(R. Chorus.) Amen.

Oratio ad pacem

(Dicat Presb.)

* Domine Deus omnipotens: qui pro humani generis redemptione coeternum tibi coequalemque filium angelica annunciatione: per Marie Virginis uterum usque ad nos voluisti transmittere: atque ante ipsius filii tui adventum Johannem dignatus es destinare preconem. Ut per ejus veridicam in deserto heremi predicationem: populus penitens veternorum facinorum acciperet veniam: per novi autem hominis Dei Regnum evangelizantis divine Trinitatis plenam mundus consequi mereretur ineffabilem gratiam. Dona nobis in hoc tempore adventus unigeniti tui eandem pacis gratiam: quam in preterita largire dignatus es secula: et illis nos in occursu fidei socies numerandos: quos in fidei primordio a Johanne in Jordane penitentie undis aquarum ablutos: a te postremo per filium in Spiritu Sancto et igni cognoscimus baptizatos.

(Respondeat Chorus.) Amen.

(Dicat Presb.)

Quia tu es vera pax nostra et charitas indisrupta vivis tecum et regnas cum Spiritu Sancto unus Deus in secula seculorum.

(R. Chorus.) Amen.

(Dicat Presb. elevatis manus in celum.)

Gratia Dei Patris omnipotentis: pax ac dilectio Domini nostri Jesu Christi: et communicatio Spiritus Sancti: sit semper cum omnibus nobis. (2 Corinthians 13:13)

(R. Chorus.) Et cum hominibus bone voluntatis. (Luke 2:14)

(Dicat Presb.)

Quomodo astatis pacem facite.

(R. Chorus.)

Pacem meam do vobis: pacem meam commendo vobis: non sicut mundus dat pacem do vobis. V. Novum mandatum do vobis ut diligatis invicem. (Reiteretur.) Pacem meam do vobis: pacem meam commendo vobis: non sicut mundus dat pacem do vobis. V. Gloria et honor Patri et Filio et Spiritui Sancto in secula seculorum amen. (Reiteretur.) Pacem meam do vobis: pacem meam commendo vobis: non sicut mundus dat pacem do vobis. (John 14:27a,13:34)

(Interim quod Chorus dicit Pacem meam: accipiat Sacerdos pacem de patena dicendo sic.)

Habete osculum dilectionis et pacis: ut apti sitis sacrosanctis mysteriis Dei.

(Et statim det pacem Diacono vel puero: et puer populo.)

(Postea inclinet se Sacerdos junctis manibus et dicat.)

Introibo ad altare Dei mei. (Psalm 42:4a)

(Respondeat Chorus.) Ad Deum qui letificat juventutem meam.

(Presbiter ponat manus super calicem et dicat.)

Aures ad Dominum.

(R. Chorus.) Habemus ad Dominum.

(Dicat Presb.) Sursum corda.

(R. Chorus.) Levemus ad Dominum.

(Dicat Presb. inclinando se et junctis manibus.)

Deo ac Domino nostro Jesu Christo filio Dei qui es in celis dignas laudas dignasque gratias referamus.

(Et dicendo Gratias referamus. Elevet Sacerdos manus in celum.)

(R. Chorus.) Dignum et justum est.

Inlatio [Illatio]

(Postea dicat Presbiter.)

* Dignum et justum est. Nos tibi gratias agere; Domine sancte Pater eterne omnipotens Deus: per Jesum Christum filium tuum Dominum nostrum. Quem Johannes fidelis amicus precessit nascendo: precessit in desertis heremi predicando: precessit baptizando. Viam quoque preparans judicii ac redemptoris: convocavit peccatores ad penitentiam: et populum salvatori adquirens baptizavit in Jordane peccata proria confitentes. Non homine innovando plenam conferens gratiam: sed piisimi Salvatoris ammonens expectare presentiam. Non remittens ipse peccata ad se venientibus: sed remissionem peccatorum ad futurum pollicens esse credentibus. Ut descendentibus in aqua penitentie: ab illo speraretur remedium indulgentie: quem venturum audiebant plenum dono veritatis et gratie. Baptizatus igitur ab eo Christus ex elemento visibili et spiritu invisibili. Ducebantur per obedientiam ad misericordiam per filium sterilis: ad filium virginis. Per Johannem hominem magnam: ad Christum hominem Deum. Quem cum Patre, et Spiritu Sancto adorant angeli atque archangeli: throni dominationes : et potestates ita dicentes.

Sanctus

(R. Chorus.)

Sanctus. Sanctus. Sanctus Dominus Deus Sabaoth: pleni sunt celi et terra gloria majestatis tue: osanna filio David [: osanna in excelsis]. Benedictus qui venit in nomine Domini: osanna in excelsis. [Agyos. Agyos. Agyos. Kyrie. O theos.]

[The first bracketted passage is not in the Liber Omnium Offerentium, the second is solely given there; otherwise the Liber and this Mass agree on this text.]

Post Sanctus

(Dicat Presbyter.)

* Vere sanctus et gloriosus Dominus noster Jesus Christus filius tuus. Quem olim credimus incarnatum fuisse pro salut humani generis: et nunc expectamus ad judicium venturum in gloria claritatis cum omnibus sanctis: ipse Dominus ac redemptor eternus.

Consecratio

(Deinde dicat Presb. in silentio junctis manibus inclinando se ante altare hunc Orationem.)

Adesto adesto Jesu bone pontifex in medio nostri: sicut fuisti in medio discipulorum tuorum: sancti + fica hanc oblationem: + ut sanctificata + sumamus per manus sancti angeli tui sancte Domine ac redemptor eterne.

Dominus noster Jesus Christus in qua nocte tradebatur accepit panem: et gratias agens bene + dixit ac fregit: deditque discipulis suis dicens. Accipite et manducate.

HOC : EST : CORPUS : MEUM : QUOD : PRO : VOBIS : TRADETUR.

(1 Corinthians 11:24; note that the traditional Roman Rite formula has been used instead since the middle ages.)

(Hic elevatur corpus.)

Quotiescumque manducaveritis: hoc facite in meam + commemorationem. Similiter et calicem postquam cenavit dicens. (Super calicem.)

HIC + EST : CALIX : NOVI : TESTAMENTI : IN : MEO : SANGUINE : QUI : PRO : VOBIS : ET : PRO : MULTIS : EFFUNDETUR : IN : REMISSIONEM : PECCATOREM.

(1 Corinthians 11:24; Luke 22:20; Matthew 26:28; note that the traditional Roman Rite formula has been used instead since the middle ages.)

(Hic elevatur calix coopertus cum filiola.)

Quotiescumque biberitis: hoc facite in meam + commemorationem.

(Et cum perventum fuerit ubi dicit In meam commemorationem. Dicat presb. alta voce omnibus diebus preter festivis: pari modo ubi dicit In claritatem de celis. Et qualibet vice respondeat Chorus: Amen.)

Quotiescumque manducaveritis panem hunc et calicem istum biberitis: mortem Domini annunciabitis donec veniet. In claritatem de celis.

(R. Chorus.) Amen.

Post Pridie

(Dicat Presb.)

* Domine Jesu Christe hanc hostiam vivam illustratione adventus sanctifica ut ex ea libantes: mundemur a crimine: et tuam gratiam mereamur percipere sine fine. R. Amen.

(Posteas dicat presb.)

Te prestante sancte Domine: quia tu hec omnia nobis indignis servis tuis: valde bona creas: sancti + ficas: vivificas + benedi + cis ac prestas nobis: ut si[n]t benedicta a te Deo nostro in secula seculorum.

(R. Chorus.) Amen.

Symbolum Constantinopolitanum

(Et tunc Presb. accipiat corpus Domini de patena et ponat super calicem discoopertum: et dicat alta voce omnibus diebus videlicet festivis et Dominicis: preter in locis in quibus erit antiphona propria ad confractionem panis.)

Dominus sit semper vobiscum. R. Et cum spiritu tuo.

(Dicat Presb.) Fidem quam corde credimus: ore autem dicamus.

(Et elevet Sacerdos Corpus Christi ut videatur a populo. Et dicat Chorus simbolum bini ac bini videlicet.)

Credimus in unum Deum Patrem omnipotentem. factorem celi et terre. Visibilium omnium et invisibilium conditorem. Et in unum Dominum nostrum Jesum Christum Filium Dei Unigenitum. Et ex patre natum ante omnia secula Deum ex Deo. Lumen ex lumine. Deum verum ex Deo vero. Natum non factum. Omousion Patri hoc est ejusdem cum Patre substantie. Per quem omnia facta sunt que in celo et que in terra. Qui propter nos homines et propter nostram salutem descendit de celis. Et incarnatus est de Spiritu Sancto ex Maria Virgine et homo factus est. Passus sub Pontio Pilato. Sepultus tertia die resurrexit. Ascendit ad celos sedet ad dexteram Dei Patris omnipotentis. Inde venturus est judicare vivos et mortuos. Cujus regni non erit finis. Et in Spiritum Sanctum Dominum vivificantorem: et ex Patre et Filio procedentem. Cum Patre et Filio adorandum et conglorificandum. Qui locutus est per Prophetas. Et unam sanctam Catholicam et Apostolicam Ecclesiam. Confiteor unum baptisma in remissionem peccatorum. Expectamus resurrectionem mortuorum: et vitam venturi seculi. Amen.

Confractio Dominici Corporis

(Corporatio.)

(Mors.) (Nativitas.) (Resurrectio.)

(Circumcisio.) (Gloria.)

(Apparatio.) (Regnum.)

(Passio.)

(Et deinde faciat Presbyter sic. Frangat Eucharistiam per medium: et ponat mediam partem in Patena: et de alia parte faciat quinque particulas et ponat in Patena: et accipiat aliam partem et faciat quatuor particulas et ponat in Patena similiter per ordinem facte per rotas istas que supra sunt. Et statim purget bene digitos: et cooperto calice fiat Memento pro vivis.)

Ad orationem Dominicam

(Postea dicat Presbyter ad orationem Dominicam equaliter istam orationem.)

Oremus.

* Verbum Patris quod cum [(Lege.) caro] factum es ut habitares in nobis. Presta nobis ut qui te venisse jam credimus: ab omni peccatorum eruamur contagione: cum preceptionis tue oraculis proclamaverimus e terris.

Pater noster qui es in celis. R. Amen. Sanctificetur nomen tuum. R. Amen. Adveniat regnum tuum. R. Amen. Fiat voluntas tua: sicut in celo et in terra. R. Amen. Panem nostrum quotidianum da nobis hodie. R. Quia tu Deus es. Et dimitte nobis debita nostra: sicut et nos dimittimus debitoribus nostris. R. Amen. Et ne nos inducas in temptationem. R. Sed libera nos a malo.

(Dicat Presb.)

Liberati a malo: confirmati semper in bono: tibi servire mereamur Deo ac Domino nostro. Pone Domine finem:...

(Hic percutiat pectus.)

...peccatis nostris: da gaudium tribulatis: prebe redemptionem captivis: sanitatem infirmis: requiemque defunctis. Concede pacem et securitatem in omnibus diebus nostris: frange audacium inimicorum nostrorum: et exaudi Deus orationes servorum tuorum omnium fielium Christianorum in hac die et in omni tempore. Per Dominum nostrum Jesum Christum filium tuum: qui tecum vivit et regnat in unitate Spiritus Sancti Deus. Per omnia secula seculorum. R. Amen.

Commixtio Corporis et Sanguinis Domini

(Sic faciat presb. Accipiat modo particulam que dicitur regnum de Patena: et ponat super calicem: in tempore resurrectionis videlicet dicat tribus vicibus.)

Vicit leo de tribu Jesse radix David alleluja.

(R. Chorus qualibet vice.) Qui sedes super Cherubin radix David alleluja.

(Et postea dicat istam orationem inter se submissa voce.)

Sancta sanctis et conjunctio corporis Domini nostri Jesu Christi: sit sumentibus et potantibus nobis ad veniam: et defunctis fidelibus prestetur ad requiem.

(Et mittat particulam in calicem et cooperiat calicem: et dicat alta voce sic: si non fuerit ibi Diachonus.)

Humiliate vos benedictioni. Dominus sit semper vobiscum. R. Et cum spiritu tuo.

Benedictio

* Illustret vos unigenitus filius Dei lumine adventus sui: qui vos redimere non dedignatus est precio sanguinis proprii. R. Amen. Accingat vos virtutibus pacis: et ditet muneribus copiosus. R. Amen. Ipsumque Dominum semper habeatis protectorem: quem omnipotens Pater suscitavit de tribu Juda victorem. R. Amen.

(Dicat Presb.)

Per misericordiam ipsius Dei nostri: qui est benedictus et vivit et omnia regit in secula seculorum. R. Amen.

Dominus sit semper vobiscum. R. Et cum spiritu tuo.

Ad accedentes (Psalm 33:9ff.)

(Dicat Chorus.)

** Gustate et videte quam suavis est Dominus alleluja: alleluja: alleluja. V. Benedicam Dominum in omni tempore: semper laus ejus in ore meo. P. Alleluja: alleluja: alleluja. V. Redimet Dominus animas servorum suorum: et non derelinquet omnes qui sperant in eum. P. Alleluja: alleluja: alleluja. V. Gloria et honor Patri et Filio et Spiritui Sancto in secula seculorum. Amen. P. Alleluja: alleluja: alleluja.

Communio

(In dicendo Gustate et videte. Accipiat Presbyter aliam particulam sequentem que dicitur Gloria. Et ponat super calicem et dicat cum silentio istam orationem.)

Panem celestem de mensa Domini accipiam: et nomen Domini invocabo.

(Et dicat sacerdos.)

Memento pro mortuis.

(Tenendo illam particulam super calicem: et dicto Memento dicat istas orationes que sequuntur.)

Domine Deus meus: da mihi corpus et sanguinem Filii tui Domini nostri Jesu Christi ita sumere: ut per illud remissionem omnium peccatorum merear accipere: et tuo sancto Spiritu repleri Deus noster: qui vivis et regis in secula seculorum. Amen.

(Oratio.)

Ave in evum sanctissima caro Christi imperpetuum summa dulcedo: panem celestem accipiam et nomen Domini invocabo.

(Hic faciat signum cum hostia et sumat particulam quam in manu habet et cooperiat calicem et veniat ad Patenam: et consumat omnes particulas per ordinem. Et deinde accipiat patenam et ponat super calicem et purget bene cum digite pollicis et dicat hanc orationem.)

Ave in evum celestis potus: qui mihi ante omnia et supra omnia dulcis es.

(Alia oratio.)

Corpus et sanguis Domini nostri Jesu Christi custodiat corpus meam in vitam eternam. Amen.

(Hic accipiat sanguinem: et dum Sacerdos sumpserit sanguinem dicat immediate hanc orationem.)

Domine Deus meus Pater et Filius et Spiritus Sanctus: fac me te semper querere et diligere: et a te per hanc sanctam communionem quam sumpsi numquam recedere: quia tu es Deus et preter te non est alius in secula seculorum. Amen.

Antifona post Communionem

(Cantet Chorus.)

** Refecti corpore et sanguine te laudamus Domine. Alleluja: alleluja: alleluja.

Oratio

(Eat Sacerdos ad cornu altaris et dicat hanc orationem.)

** Refecti Christi corpore et sanguine pariter: quia sanctificati Deo Patri omnipotenti gratias referamus: ut nos in eandem refectionem et sanctificationem habentes hic: et in futuro seculo gloriam percipiamus. R. Amen.

(Dicat Presb.)

Per misericordiam tuam Deus noster: qui es benedictus et vivis et omnia regis in secula seculorum. R. Amen.

Dominus sit semper vobiscum. R. Et cum spiritu tuo.

(Dicat Presb. vel Diachonus.)

Solemnia completa sunt in nomine Domini nostri Jesu Christi: votum nostrum sit acceptum cum pace. R. Deo gratias. [For greater feasts.]

(Vel:)

Missa acta est in nomine Domini nostri Jesu Christi lumen cum pace. R. Deo gratias. [For ordinary days.]

(Ista oratio supradicta sit in medium altaris.)

Antifona

(In fine Misse dicitur Antifona in laudem gloriose Virginis Marie.)

Salve regina misericordie. Vita dulcedo et spes nostra salve. Ad te clamamus exsules filii Eve. Ad te suspiramus gementes et flentes in hac lachrymarum valle. Eya ergo advocata nostra: illos tuos misericordes oculos ad nos converte. Et Jesum benedictum fructum ventris tui nobis post hoc exilium ostende. O clemens. O pia. O dulcis Virgo semper Maria.

V. Post partum Virgo inviolata permansisti. R. Dei Genitrix, intercede pro nobis.

Concede nos famulos tuos, quesumus, Domine Deus, perpetua mentis et corporis sanitate gaudere: et, gloriosa beatae Mariae semper Virginis intercessione, a presenti liberari tristicia et aeterna perfrui leticia. Per Dominum nostrum Jesum Christum filium tuum: qui tecum vivit et regnat in unitate Spiritus Sancti Deus, per omnia secula seculorum. R. Amen.

Benedictio

In unitate Spiritus Sancti benedicat vos Pater et Filius.